சத்தியம் டிவியில் பத்து பேர் பங்குதாரர்களாம். அத்தனை பேரும் கிறிஸ்தவ தொழிலதிபர்கள் என்று சொல்லப்படுகிறது. அவர்களில் முக்கியமானவர் மோகன் சி.லாசரஸ் எனும் மீடியா மேனியான். அவருக்கு ஒரு தரிசனம். ”உள்ளது உள்ளபடி” செய்திகளைத் தர ஒரு ஊடகம் வேண்டும். கிறிஸ்தவம் தொடர்பான சேதிகளை மறைக்கும் மற்ற ஊடகங்களின் வஞ்சகத்துக்கு மாற்றாக இது விளங்கவேண்டும். ஆனாலும் ஒரு சானலை வெற்றிகரமாக நடத்த மிஸ்டர் “ப” அவர்களின் உதவியில்லாமல் முடியாது. அதேநேரத்தில் பாலை குடிக்காமல் தவம் இருக்க பூனையால் முடியாது. உலகத்தையே கண்கொண்டு பார்க்கமாட்டேன் என்று சொல்லும் கிறிஸ்தவனால் இங்கே பிழைக்கவும் முடியாது.

என்ன செய்யலாம் ? சமரசம் செய்துகொள்ளுவதே இருக்கும் ஒரே வழி. அதற்கேற்ற மனநிலையுள்ளவர்களின் ஒத்துழைப்போடு அடிப்படைவாத எண்ணமுடையோரின் சிந்தையையும் மாற்றவேண்டும். கிறிஸ்தவத்தில் உலகப்பிரகாரமான காரியங்கள் கலக்கக்கூடாது என்று முரண்டுபிடிப்போரை கழட்டிவிட்டு கண்டுகொள்ளாமல் போகவேண்டியது. எப்போதும் திரள்கூட்டத்தார் மாயைக்கு தலைவணங்கக்கூடியவர்கள் என்பதால் அவர்களைக் கவரும்வண்ணமாக பேசி நடித்து அனுதாபத்தையும் ஆதரவையும் பெறவேண்டியது. இவையெல்லாவற்றுக்கும் உறுதுணையாக இருக்கவே இருக்கிறார்கள், கறுப்பு பணமுதலைகள், தொழிலதிபர்கள், அரசியல்வாதிகள், சினிமா பிரபலங்கள்.

இயேசுவை மட்டும் ஒதுக்கிவிட்டால் உலகமே நம் சொந்தம் தானே ? இயேசுவை ஒதுக்குவது என்பது ஒரேயடியாக புறக்கணிப்பது அல்ல. நம்மிடம் வருவோரை சங்கடப்படுத்தாமல் உறவை ஏற்படுத்த இயேசுவின் குறிப்பிட்ட உபதேசம் தடையாக இருக்குமானால் அதை அப்போதைக்கு பேசாமல் தவிர்ப்பது. அவர்களுடைய ஆசீர்வாதத்துக்காக ஜெபிப்பது. நட்பை பராமரித்துக்கொள்ளுவது. அந்த ஆண்டவரே பார்த்து என்றைக்காவது அந்த நபரோடு பேசினால் பேசட்டும். இல்லாவிட்டாலும் நமக்கு என்ன நட்டம் ? நாய் வித்த காசு குரைக்குமா என்ன ?

இன்றைக்கு கடன் வாங்குவது தவறல்ல, என்று உபதேசத்தை திரிக்கும் இவர் கொஞ்ச நாளில் லஞ்சம் வாங்குவது தவறல்ல என்றும் சொல்லக்கூடும். ஏனென்றால் லஞ்சம் வாங்கியவர் கொடுக்கும் பணத்தில் தானே ஊழியமே நடக்கிறது ? வருமான வரிவிலக்கு பெறும் நோக்கத்துடன் இதுபோன்ற அறக்கட்டளை ஸ்தாபனங்களில் சென்று கொட்டப்படும் கோடிக்கணக்கான பணங்களை வைத்து மீடியாவில் மிரட்டி திரள்கூட்டத்தின் ஒரே பிரதிநிதி போலவும் மொத்த கிறிஸ்தவத்துக்கும் குத்தகைதாரர்போலவும் செயல்படும் இவர்களிடம் திருச்சபையினர் எச்சரிக்கையாக இருக்கவேண்டும்.

சத்தியம் டிவியின் நிகழ்ச்சிகள் எந்தவிதத்திலும் பக்திவிருத்திக்கேற்றதாக இல்லை.அதில் ஸ்லாட் ஒதுக்கி வழங்கப்படும் கிறிஸ்தவ நிகழ்ச்சிகளாலும் பெரிய பயனேதும் இல்லை. அவை ஏற்கனவே தமிழன் டிவி,விண் டிவி,ராஜ் டிவி,ஜெயா டிவி போன்ற பொழுதுபோக்கு சானல்களில் வழங்கப்பட்டவண்ணமாகவே இருக்கிறது. அவையும் கூட இலவசமாக தரப்படாமல் பணம் கொடுத்தே பெறப்படுகிறது. அதன்காரணமாகவே நிகழ்ச்சியின் இறுதியில் அவர்கள் காணிக்கை கேட்கிறார்கள். மக்கள் மனதில் இடம்பிடிக்க இந்த மீடியா மிருகங்கள் போடும் வேடங்களும் நடிப்பும் அபாரம். ஆனாலும் அதனால் பரமனுக்கோ பரலோகத்துக்கோ ஒரு மேன்மையும் இல்லை. எப்போது குட் ந்யூஸ் டெலிவிஷன் என்ற பெயரில் ஒரு கம்பெனி நேரு தைரியம் என்பவர் பெயரில் துவங்கப்பட்டு இதுபோன்ற நிகழ்ச்சிகள் ஒளிபரப்பாகத் துவங்கியதோ அதன்பிறகே மொத்த கிறிஸ்தவமும் தரமிழந்து நாடகமயமானது.

இந்நிலையில் இதோ தன் நோக்கத்தையும் தரிசனத்தையும் மறந்து ஒரு கிறிஸ்தவ சானல் சினிமாவையும் நடிகர்களையும் சினிமா கம்பெனிகளையும் குறித்து மக்களுக்கு எடுத்துசொல்லும் கட்டாயத்துக்குத் தள்ளப்பட்டிருக்கிறது. இதுபோன்ற சமரசங்களை செய்யாமல் ஒரு சானலை வெற்றிகரமாக நடத்தமுடியாது என்பதாலேயே பெரியவர்கள் சினிமா மற்றும் உலகப் பிரகாரமான கார்ரியங்களுக்கு விலகியிருக்க சொன்னார்கள்.

 மாடர்ன் தியேட்டர்ஸ்:

மாடர்ன் தியேட்டர்ஸ் லிமிடெட் 1935 ஆம் ஆண்டில் தமிழ்நாட்டின் சேலத்தில் திருச்செங்கோடு ராமலிங்கம் சுந்தரம் துவக்கிய திரைப்படத்தயாரிப்பு நிறுவனம் . தென்னிந்தியாவில் முதன்முதலாக உருவாக்கப்பட்ட திரைப்படக்கூடம். சென்னை போன்ற பெரிய நகரங்களை விட்டு சேலம் போன்ற வெளிநகரம் ஒன்றில் மாடர்ன் தியேட்டர்ஸ் உருவாக்கப்பட்டது. மாடர்ன் தியேட்டர்ஸ் திரைப்படக்கூடம் ஒரு காலத்தில் வருடத்திற்கு மூன்று படங்களையாவது உருவாக்கிக்கொன்டிருந்தது. முதன்முதலில் தென்னிந்தியாவில் வண்ணப்படத்தை தயாரித்த பெருமை மாடர்ன் தியேட்டர்ஸுக்கு உண்டு. இந்த நிறுவனத்தின் தயாரிப்பு அரங்கில் 1982 ஆம் ஆண்டு வரை 150க்கும் மேலான தமிழ்,தெலுங்கு, மலையாளம் ஹிந்தி, சிங்களம் மற்றும் ஆங்கிலத்திலும் திரைப்படங்கள் தயரிக்கப்பட்டுள்ளன. இவற்றில்
பெரும்பாலானவை தமிழ் திரைப்படங்களே.

கிரிவலம் 

திருவண்ணாமலை : திருவண்ணாமலை தீபம் உலகப்பிரசித்திப்பெற்ற ஒரு நிகழ்ச்சியாகும். இங்கு சிவன் தீபத்தில் எழுந்தருளியுள்ளார். கோவில் நகரமான திருவண்ணாமலை சென்னையிலுருந்து 180 கிலோமீட்டர் தொலைவிலுள்ளது. இந்தக்கோவில் இந்தியவிலேயெ மிகப்பெரியதாகும். சிவன் பார்வதி அருணாசலேஸ்வரர் ஆகிய கடவுள்களை கொண்ட இந்த கோவில் 66மீட்டர் உயரமுள்ளது. இங்குள்ள சிவன் லிங்கத்திலிருந்து உருவானவர். இவருக்கு அண்ணாமலையார் என்ற பெயரும் உண்டு. இந்த தலத்தைப்பற்றி மாமுனிவர்களும் கவிஞர்களும் ஏராளமான பாடல்களைப் பாடியுள்ளனர். துறவி ரமணா இங்கு 50 ஆண்டுகளுக்கு மேல் வாழ்ந்து 1950 ம் ஆண்டு இறந்தார். இவரது ஆசிரமம் திருவண்ணாமலை மேற்கு புரத்தில் அமைந்துள்ளது. மலையைச்சுற்றி நீண்டபாதை அமைந்துள்ளது. இதை சுற்றி பக்தர்கள் வலம் வருவர். இதற்கு கிரிவலம் என்று பெயர். மாதந்தோறும் முழு நிலவு தினத்தன்று கிரிவலம் நடை பெறும். தீபத்தையொட்டி தேரோட்டம் நடைபெறும். ஏராளமான பக்தர்கள் கலந்துகொண்டு ஓம்...ஓம் என்று கோஷமிட்டவாரே தேரை வடம் பிடித்து இழுப்பர்.

மேற்காணும் இரு செய்திகளால் கிறிஸ்தவத்துக்கு என்ன நன்மை என்று புரியவில்லை. இதுபோன்ற செய்திகளை ஒளிபரப்பி கிறிஸ்தவர்களல்லாதோரின் மனதில் இடம்பிடித்து பிறகு கொஞ்சம் கொஞ்சமாக ஆண்டவரை சொல்லுவது திட்டமோ என்னவோ ? எல்லா சாமியும் ஒண்ணுதானே என்று நினைக்கும் பொதுநலவாதிகளே இவர்களை சூழ்ந்திருக்கிறார்கள். என் சாமியை திட்டாதே நான் உன் சாமியை திட்டாதே என்பதே இந்தியாவின் பெரும்பான்மையினராக இந்து மக்களின் கோரிக்கையாக இருக்கிறது. ஒருவேளை மதசார்பற்ற சானலாக தன்னைக் காட்டிக்கொள்ளும் கட்டாயத்தினால் இப்படியெல்லாம் செய்திகளை வெளியிடுகிறார்களோ என்னவோ ? அப்படி சட்டத்துக்கு அஞ்சி சத்தியத்தை மறைப்பதும் கூட நேர்மையான செயல் அல்லவே ? சட்டத்தையும் ஏமாற்றி ஆண்டவருக்கும் துரோகம் செய்து அப்படி எதற்காக கோடிக்கணக்கில் முதலீடு செய்து ஒரு ஊழியத்தை நடத்தவேண்டும் ? அப்படியானால் அது ஊழியம் அல்ல,கம்பெனியாகவே இருக்கும்.

(தொடரும்)